ممدوح عباس
أسلوب الإدارة بالبيانات هو نمط جديد، وواضح إن حضرتك جايبه من أسبانيا علشان كده محدش– وأولهم العبدلله – هيفهمه بسرعة. أنا رأيي تودي جماهير مصر أسبانيا أسبوعين ولا تلاتة على حسابك لأخذ دورة في أسلوب الإدارة بالبيانات النارية.. اقتراح ناري.. مش كده؟
مجلس الزمالك
لم يعجبني في البيان الناري الحنجوري تبع تحذير جماهير الأهلي والعنصرية والمهلبية والكلام ده، إلا حتة – الذهاب للفيفا -، وبعد اللي حصل من جماهير الأهلي ضد شيكابالا، أنا سمعت إن البحث جاري عن عنوان الفيفي.. قصدي الفيفا.. وأنا يعني بكل تواضع ومحبه، دورت في جوجل وبوجل وياهو ويالهوتي وجيبت العنوان..
Fédération Internationale de Football Association (FIFA)
Headquarters: FIFA House, 11 Hitzigweg, 8030 Zurich, Switzerland
Address for correspondence: FIFA, P.O. Box 85, 8030 Zurich, Switzerland
Tel: 41-1/384 9595
Fax: 41-1/384 9696
لا شكر على واجب، والله عندي استعداد أجيب عنوان بيت بلاتر لو عايزينه.
الموقع الرسمي للزمالك
صدور بيان جديد بعد صافرة الحكم الطلياني المهبب بـ 112 ثانية يبشر فيه عباس جماهير الزمالك بالفوز على حرس الحدود في الكاس، يجسد التماسك الهلامي والتكاتف الوجداني، وأي حاجة من كلام المهلبية ده.. لكن بعض الخبثاء استغربوا من سرعة إصدار البيان، وواحد فيهم – مش أنا – سأل إنتم عرفتم إن الزمالك هيتغلب ازاي؟!!
الموقع الرسمي (2)
بصراحة الحاجة اللي تستاهل بيان طلياني عنصري.. وأوعدكم مفتحش بُقي.. ضربة الجزاء!!..
أحمد حسن
الفوز على قدوم الواردين من أندرلخت.
أحمد فتحي
لو كنت روحت الزمالك كان نتيجة الماتش زمانها 1-1.. منك لله يا بعيد..
جوزيه
خلع الجاكت المرة دي شرعي، علشان الحر، بس الحمدلله إن البدري لحقك وقالك في ودانك إن الجماعة اللي بيستفزوك بيشتغلوا في برامج صاحبك.. اللي انته عارفه..
جمال جبر (رئيس تحرير موقع الأهلي الرسمي)
لم ألحظ أنك تكتب مقال في الموقع.. عموما الكرافتة شكلها حلو.. بس بصراحة لم يعجبني طريقة انتقادك لحسن شحاته.. الراجل لم يقل أي شئ في الكويت – كما تدعي – هو سُئل عن الحضري وأجاب نفس الجواب اللي إيام عمرو ذكي مع الزمالك.. عموماً علشان نفهم الليلة ياريت نعرف دا رأيك ولا رأي الموقع الرسمي بتاع النادي الأهلي؟.. بس ياريت الجواب يكون بسرعة، علشان الضغط كثير على الموقع الرسمي للزمالك!!
الأربعاء أبريل 30, 2008 7:49 pm
